Back

ⓘ Ռիչըրտ Կիրակոսեան




                                     

ⓘ Ռիչըրտ Կիրակոսեան

Ռիչըրտ Կիրակոսեանը ծնած է 1965 թուականի Յունուար 8-ին ԱՄՆ Փրովիտընս քաղաքին մէջ։ Ռիչըրտ Կիրակոսեանի մասնագիտական գործունէութիւնը սկսած է Միացեալ Նահանգներուն մէջ։ Ռիչըրտ Կիրակոսեանը աշխատած է տարբեր հեղինակաւոր կազմակերպութիւններու մէջ, ինչպէս են Ամերիկեան համաժողով գոնկրէսը, "Ազատութիւն" ռատիօկայանի Եւրոպական կեդրոնակայանը, "Ճէյնզ Ինֆօրմէյշըն Կրուբ" Janes Information Group եւ այլն։ 2000-ական թուականներու սկիզբները տեղափոխուած է Հայաստան: 2009 թուականի Փետրուարէն մինչեւ 2011 թուականի Մարտ ամիսը զբաղած է Ռազմավարական եւ Ազգային Հետազօտութիւններու Հայկական Կեդրոնի տնօրէնի պաշտօնով:

2011-ի Ապրիլէն սկսեալ՝ ան կը ղեկավարէ, իր կողմէ ստեղծուած, "Տարածաշրջանային Հետազօտութիւններու Կեդրոնը" ՏՀԿ: Կեդրոնը անկախ, շահոյթ չհետապնդող հետազօտական կեդրոն է, որ կառաջարկէ լայնամաշտաբ ռազմավարական վերլուծութիւններ եւ անկողմնակալ հետազօտութիւններ, ինչպէս նաեւ կիրականացնէ շարք մը կրթական եւ քաղաքականութեան հետ առնչուող ծրագրեր։ Կիրակոսեանի գլխաւորութեամբ կեդրոնը արտաքին քաղաքականութենէ զատ կը վերլուծէ նաեւ Հայաստանի ներքին քաղաքական կեանքը։ Արտաքին քաղաքականութեան մէջ կողմ է Թուրքիայի հետ առանց նախապայմաններու յարաբերութիւններուն հաստատմանը:

Ռիչըրտ Կիրակոսեանի վերլուծական նիւթերը կը տպագրուին Center for Strategic and International Studies CSIS, the International Security Network ISN, the Swiss Peace Foundation, Janes Defence Weekly, Democratizatiya, the Journal of Slavic Military Studies, Janes Islamic Affairs Analyst, the Turkish Daily News, եւ the Harvard International Review յայտնի պարբերականներուն մէջ։

Ռիչըրտ Կիրակոսեանը նաեւ թրքալեզու Newsweek շաբաթաթերթի սիւնակագիր է եւ անգլալեզու the Turkish Policy Quartly ամսագրի խմբագրակազմի անդամ է։

Ամուսնացած է, ունի մէկ դուստր: