Back

ⓘ Նազարէթ Պէրպէրեան




                                     

ⓘ Նազարէթ Պէրպէրեան

Նազարէթ Պէրպէրեան ծնած է 3 Օգոստոս, 1951-ին Սուրիա, Հալէպ: Հրապարակագիր, Խմբագիր: Մտաւորական Նազարէթ Պէրպէրեանը, աւելի քան քառասուն տարիներու վրայ երկարող մամլոյ ու ազգային իր ծառայութիւններուն համար, պարգեւատրուած է "Ս. Մեսրոպ Մաշտոց" շքանշանով:

                                     

1. Կենսագրութիւն

Նազարէթ Պէրպէրեան ծնած է Նոր Գիւղ Հալէպ, Սուրիա, 3 Օգոստոս 1951-ին: Մինչեւ նախակրթարանի Բ. դասարանը յաճախած է Նոր Գիւղի Ազգային "Զաւարեան" վարժարանը: 1959-ին ընտանեօք տեղափոխուած են Լիբանան, ուր հաստատուած են Պուրճ Համուտի Նոր Սիս թաղամասը: Նախնական Ուսումը ստացած է տեղի հայկական վարժարաններուն մէջ։ Նախակրթարանէն ետք մէկ տարի Տպայայի "Կենաց" վարժարանը յաճախելէ ետք, միջնակարգ եւ երկրորդական ուսումը շարունակած է Պուրճ Համուտի առաջին ազգային երկրորդական վարժարանին` նորաբաց "Լեւոն եւ Սոֆիա Յակոբեան" քոլեճի մէջ: Նախակրթարանի վերջին տարիներուս կ՛անդամակցի թաղի ՀՅԴ "Քրիստափոր" պատանեկան միութեան:

Երկրորդականի աշակերտութեան վերջին տարիները վճռորոշ նշանակութիւն ունեցան դաշնակցականի իր կազմաւորումին մէջ։ Անդամակցեցելով եւ աշխուժ մասնակցութիւն բերելով ՀՅԴ "Զաւարեան" աշակերտական միութեան Պուրճ Համուտի մասնաճիւղին:

1969-1970 կրթական տարեշրջանը կըսկսի՝ մէկ կողմէ Ա. պաքալորէան "գիտական" բաժնի մէջ ստանալէն ետք, ուսումը շարունակելու համար կ՛ընտրէ հրապարակագրութիւնը, Բ. պաքալորէան "Փիլիսոփայութեան" արաբերէն լեզուով ճիւղին մէջ մտնելով կը յաջողի մտնել Լիբանանի պետական համալսարանի նորաբաց "Հրապարակագրութեան կաճառ" ը, որ այդ շրջանին հրապարակագրութեան մէջ լիսանս տուող միակ համալսարանն էր երկրին մէջ:

1977-ի օգոստոսին կ՛ամուսնանայ Էվա Տէրվիշեանի հետ, որ եղած էր տարիներու գործընկերը "Ազդակ" ի յարկին տակ: Ունին երեք զաւակ` Խաժակ, Շաղիկ եւ Հրակ:

                                     

2. Նազարէթ Պէրպէրեանի Ազդակ Օրաթերթի խմբագրութեան գործունէութիւնը

Ուսանողական շրջանին մասնակցած է Ազդակ Օրաթերթի խմբագրութեան՝ աշխատակցիլ "Ազդակ" ին, առանց որ ուղղակի խմբագրութեան մաս կազմէ. խմբագրութեան կը միանայ 1971-ին, երբ "Ազդակ" ը թեւակոխեց ութէջեայ ամէնօրեայ հրատարակութեան շրջանը:

Նազարէթ Պէրպէրեան կը գրէ՝

1973-ին, երբ Պօղոս Սնապեան կոչուեցաւ "Բագին" ամսագրի լիաժամ խմբագրի պաշտօնին, "Ազդակ" ի մէջ գլխաւոր խմբագրի պատասխանատուութիւնը կը վստահուի Նազարէթ Պէրպէրեանին: Համալսարանի վերջին տարին էր։ Նաեւ ՀՅԴ Զաւարեան ուսանողական միութեան ատենապետ ընտրուած էր:

Միասին իր տիկնոջ՝ Էվա Տէրվիշեանի հետ, որ եղած էր տարիներու գործընկերը "Ազդակ" ի յարկին տակ. սկսած էին խմբագրել ութէջեայ "Ազդակ" ի, առաջին իսկ օրերէն, լիբանահայ ազգային կեանքի լրատուութեան եւ յօդուածագրութեան էջը:

                                     

3. Նազարէթ Պէրպէրեանի "Դրօշակ" ի խմբագրութեան գործունէութիւնը 1982 - 2005

1969-ին սկաւ Ազդակ Շաբաթօրեակ-Դրօշակի հրատարակութիւնը, որ փաստօրէն "ԴՐՕՇԱԿ" ն էր՝ Հայ Յեղափոխական Դաշնակցութեան կեդրոնական օրկանը, որ արտօնագրային շարք մը դժուարութիւններու պատճառով Ազդակ շաբաթօրեակի պաշտօնական գրանցումով կը հրատարակուէր:

Դրօշակի այս երկրորդ շրջանի առաջին Գլխաւոր խմբագիրն էր Բաբկէն Փափազեանը մինչեւ 1978-ը, որ Սարգիս Զէյթլեանը ստանձնեց գլխաւոր խմբագրի պաշտօնը:

Ն. Պէրպէրեանը 1982-էն եղած է օգնական խմբագիր, իսկ 1985-էն երբ Սարգիս Զէյթլեանը զոհ դարձաւ անարգ ոճիռին, Նազարէթ Պէրպէրեանը ստանձնած է Դրօշակի գլխաւոր խմբագիրի պատասխանատուութիւնը եւ հաստատուելով Յունաստան վարած է Դրօշակի խմբագիրի պաշտօնը:

1999-ի Յունուարէն սկսեալ "Դրօշակ" ի խմբագրութիւնը հաստատուեցաւ Երեւան, ուրկէ եւ շարունակուեցաւ մեր պաշտօնաթերթին հրատարակութիւնը: Այդ տարիներուն, ընտանիքը Աթէնք մնալով հանդերձ, տարին ութ ամիս Նազարէթ Պէրպէրեան կ՛ապրի եւ կը գործէ Երեւանի մէջ մինչեւ 2005-ին երբ ՀՅԴ Բիւրոն ժամանակաւորապէս դադրեցուց Դրօշակի հրատարակութիւնը:



                                     

4. Նազարէթ Պէրպէրեանի գաղափարական ու քաղաքական մեկնաբանութիւնները

Լինելով աւելի քան երկու տասնամեակ Դաշնակցութեան կեդրոնական օրգանի գլխաւոր խմբագիրը, Նազարէթ Պէրպէրեանը իւրայատուկ է իր գաղափարական ու քաղաքական մեկնաբանութիւններով, մեկնաբանութիւններ որոնք երկար տարիներ առաջնորդեցին դաշնակցութեան շուրջ համախմբուած երիտասարդութեանը՝ այն տարիներուն երբ սփիւռքի դժուար պայմաններուն կազմաւորուեցաւ Հայ Դատի աշխատանքներու նոր հանգրուանը եւ երբ սփիւռքին մէջ ծնած ու ուսում առած գաղափարական երիտասարդութիւնը կը փորձէր Դաշնակութեան տեսաբանական դաշտը համապատասխանեցնել իր առօրեային:

                                     

5. Նազարէթ Պէրպէրեանի "Ազատ Օր" ի խմբագրութեան աշխատակցութիւնը

2008 թուականէն ասդին մաս կը կազմէ Յունաստանի ՀՅԴ պաշտօնաթերթ "Ազատ Օր" ի խմբագրութեան` իբրեւ մնայուն աշխատակից, որ կը պահէ "Յուշատետր" վերտառութեամբ ամէնօրեայ սիւնակ մը` ներկայացնելով այդ օրուան զուգադիպող դէմքեր ու դրուագներ հայ ժողովուրդի կեանքէն:

                                     

6. Նազարէթ Պէրպէրեան Կը Պարգեւատրուի "Ս. Մեսրոպ Մաշտոց" շքանշանով

14 Հոկտեմբերի 2011-ին, "Ասպարէզ" օրաթերթի խմբագրութեան կողմէ ի պատիւ Արամ Ա. վեհափառ հայրապետին կազմակերպուած ընդունելութիւնը առիթ եղաւ պատուելու բազմաշխատ խմբագիր ու մտաւորական Նազարէթ Պէրպէրեանը, աւելի քան քառասուն տարիներու վրայ երկարող մամլոյ ու ազգային իր ծառայութիւններուն համար, Կը պարգեւատրուի Հրապարակագիր Նազարէթ Պէրպէրեան "Ս. Մեսրոպ Մաշտոց" շքանշանով:

                                     

7. Աղբիւրներ

  • Արամ Ա. Վեհափառին Ի Պատիւ Ընդունելութիւն "Ասպարէզ" ին Կողմէ. Կը Պարգեւատրուի Հրապարակագիր Նազարէթ Պէրպէրեան
  • Ազատ Օր օրաթերթի խմբագիր՝Նազարէթ Պէրպէրեանի հետ
  • ՄԱՄԼՈՅ ԾԱՌԱՅՈՒԹԵԱՆ ՔԱՌԱՍՆԱՄԵԱԿԻ ԱՌԻԹՈՎ-ԻՆՔՆԱԿԵՆՍԱԳՐԱԿԱՆ
                                     
  • ՄԱՐՏԻԿԸ, ԱԶԳԱՅԻՆ ՂԵԿԱՎԱՐԸ ԵՒ ՀԱՅԱՍՏԱՆԻ ԱՆԿԱԽՈՒԹԵԱՆ ԴԱՇՆԱԿՑԱԿԱՆ ԿԵՐՏԻՉԸ, ՆԱԶԱՐԷԹ ՊԷՐՊԷՐԵԱՆ 4 - 2 - 2012 Հայկական հետազօտութիւններու հիմնարկ Մայիսեան բարենորոգումներ

Users also searched:

ազդակ, ասբարեզ, գաղութներ, մեր ուղին,

...
...
...