Back

ⓘ Եփրատ Գոլէճ




Եփրատ Գոլէճ
                                     

ⓘ Եփրատ Գոլէճ

Եփրատ Գոլէճ, հիմնուած է 1878-ին Խարբերդի մէջ:

1852-ին Ամերիկացի Ճորճ Տընմօր Խարբերդի բարձունքը կը գնէ Քէշիշօղլուին խոնախը, ուր հետագային կը կառուցուին Եփրատ գոլէճի շէնքերը: Առաջին կրթական հաստատութիւնը կըլլայ Աստուածաբանական վարժարանը, որ կը հիմնուի 1859-ին: Նոյն տարիներուն Ամերիկեան միսիոնը քաղաքին մէջ կը բանայ նաեւ նախակրթարաններ: 1878-ին Խարբերդի մէջ կը բացուի մանչերու գոլէճը, որ սկիզբը կանուանուի Արմէնիա գոլէճ, հետագային՝ Եփրատ գոլէճ:

Մինչեւ վեց տարեկան երախաները մանկապարտէզ կը յաճախեն: Յետոյ կանցնին մանկարան, ուր կը մնան երեք տարի: Այնուհետեւ կը յաճախեն կրթարան, որուն տեւողութիւնը նոյնպէս երեք տարի է: Ապա կարգը կու գայ վարժարանին, ուր աշակերտ մը պէտք է երեք տարի շարունակ դասընթացքներու հետեւի: Հետագային այս համակարգը որոշ փոփոխութիւններու կենթարկուի:

Այսպէս, վարժարանի երկրորդական մասը կը տեւէ չորս տարի: Հոսկէ շրջանաւարտներըկրնան գոլէճ մտնել, որու դասընթացքները նոյնմէս կը տեւէն չորս տարի: Գոլէճի շէնքին մէջ նաեւ կը գտնուի 8000 գիրքերէ բաղկացած գրադարան մը: Գիրքերը մեծամասնութեամբ հայերէն են: Գրադարանը կը ստանայ պոլսական մամուլը: 1889-ին գոլէճը կօժտուի իր սեփական տպարանով, ուր կարելի է հայատառ եւ լատինատառ տպագրութիւններ կատարել: 1909-ին գոլէճը կունենայ իր հայերէն պաշտօնաթերթը, "Եփրատ" ը: 1913-ին, Եփրատ գոլէճը կը տօնէ հայոց գիրերու գիւտին 1500-ամեակը:

Աղջկանց դպրոցին շէնքը կառուցուած է տղոց դպրոցին մօտ: Երկու շէնքերուն միջեւ կայ գոլէճին տնօրէնին յատկացուած շէնքը: 1907-ին, Տօքթ. Հըրպըրթ Էթքինսընի նախաձեռնութեամբ աղջկանց գոլէճին մէջ կը բացուի նաեւ մանկաբարձութեան առանձին բաժանմունք մը, ուր կը դասաւանդուին՝ հիւանդապահութիւն, մանկանց հոգատարութիւն, մանրէաբանութիւն, մարդակազմութիւն, դեղաբանութիւն, ծննդաբանութիւն: Գոլէճի մէջ մեծ տարբերութիւններ չկան աղջկանց եւ տղոց դասաւանդուած նիւթերուն միջեւ։ Աղջկանց մօտ թրքերէնի դասաւանդութիւնը պարտադիր չէ, աղջիկները կը սորվին նաեւ ձեռարուեստ, դերձակութիւն, խոհարարութիւն: