Back

ⓘ Արմէն Յարութիւնեան




                                     

ⓘ Արմէն Յարութիւնեան

Արմէն Յարութիւնեան ծնած է 6 Փետրուար 1930-ին, Հալէպ: Գործարար, բարերար, գրող, հրապարակախօս: Ծառայած է Հայ եկեղեցիին իբրեւեւ Դպիր,սարկաւագ եւ Աւագ սարկաւագ: Այնթապի Հայրենակցական Միութեան ատենապետ: ՀԵԸ-ի տեղական վարչութեան անդամ: ՀԲԸՄ-ի Շրջանակային Յանձնաժողովի անդամ

                                     

1. Կենսագրութիւն

Արմէն Յարութիւնեան ծնած է 6 Փետրուար, 1930-ին, Հալէպ, Սուրիա: Յաճախած է Հալէպի Կրթասիրաց վարժարանը, ապա Ալեփփօ Գոլէճ: Հայրը եղած է բարեգործ անձնաւորութիւն:

Ուսանելու ընթացքին հետեւած է առեւտուրի, ապա սկսած է արտադրել սեփական զարդադեղերը Գոսմեթիք:

1961-ին կը փոխադրուի Պէյրութ եւ կը հիմնէ սեփական գործարանը:

Փոքր տարիքէն եղած է Հալէպի Այնթապի Հայրենակցական Միութեան վարչական, ապա՝ ատենապետ: Լիբանան փոխադրուելէ ետք երկար տարիներ վարած է Այնթապի Հայրենակցական Միութեան ատենապետի պաշտօնը:

Աւելի քան եօթանասուն տարի ծառայած է Հայ եկեղեցիին, իբրեւեւ դպիր,սարկաւագ եւ Աւագ սարկաւագ:

Հալէպի մէջ կը մտնէ Հայ Երիտասարդաց Ընկերակցութեան ՀԵԸ շարքերը: Լիբանանի մէջ եղած է ՀԵԸ-ի տեղական վարչութեան անդամ: Նաեւ՝ ՀԲԸՄ-ի Շրջանակային Յանձնաժողովի անդամ:

                                     

2. Հայոց Պատմութեան Ուսուցիչներու Ֆոնտ

ՀԲԸՄ-ի վարժարաններու եւ Թէքէեան վարժարանի հայերէնի եւ հայոց պատմութեան ուսուցիչներուն համար հիմնած է ֆոնտ՝ տարեկան մէկ ամսական նուէր: Նոյնը յետագային կատարած է Լիբանանի ազգային վարժարաններու ուսուցիչներուն:

                                     

3. Պէյրութի Հայկազեան Համալսարանի ուսանողներու Ֆոնտ

Երկուշաբթի, 2 դեկտեմբեր 2013-ին, Հայկազեան համալսարանի սեղմ շրջանակի մը մէջ, Լիբանանահայութեան ծոցին մէջ իր վաթսունամեակի սեմին գտնուող Հայկազեան համալսարանին համար իւրօրինակ այս նուիրատուութեան պաշտօնական արարողութիւնը կատարուեցաւ: Արդարեւ, տէր եւ տիկին Արմէն եւ Սալբի Յարութիւնեաններ 250.000 ամերիկեան տոլարի հայ ուսանողներու կրթանպաստի անձեռնմխելի ֆոնտ մը հաստատեցին Հայկազեան համալսարանին մէջ։ Աւելի քան երեսուն ուսանողներու նպաստ տրամադրած է համալսարանական ուսման համար:

                                     

4. Հրատարակչութիւններ

Արմէն Յարութիւնեան մնայուն աջակցածէ Լիբանանահայ մամուլին: Ան Լիբանանահայ մամուլի մէջ ստորագրած է բազմաթիւ յօդուածներ: Իր ստորագրութեամբ երեք հատորներու հեղինակ է: Սոյն հատորները ծանօթ են "Նամակներ Պէյրութէն" վերտառութեամբ:

"Նամակներ Պէյրութէն-Բ." հատորի հեղինակ Արմէն Յարութիւնեան: Գիրքը լոյս տեսած է Պէյրութ, 2010-ին, կը տարածուի 376 էջերու վրայ, կը բովանդակէ հարիւր նամակ, որոնք կը կրեն 101-էն 200 թիւերը: Շարքը կը սկսի 4 օգոստոս 2002-էն, կը հասնի դեկտեմբեր 2004-ի: Այսինքն` գրիչի մօտաւորապէս մէկ ու կէս տարուան արգասիք:

"Նամակներ Պէյրութէն-Բ." հատոր լոյս տեսած է Յարութիւն եւ Միմի Արմէնեաններու մեկենասութեամբ:

Հեղինակը՝ Արմէն Յարութիւնեան, հատորը ձօնած է Յարութիւն Արմէնեանի կնոջ` Միմիին:

                                     

5. Պարգեւներ

Երեքշաբթի, 3 Հոկտեմբեր 2017-ի առաւօտեան, Լիբանանի մէջ Հայաստանի դեսպան Սամուէլ Մկրտիչեան այցելեց լիբանանահայ համայնքի ծանօթ դէմքերէն Արմէն Յարութիւնեանի բնակարանը եւ անոր յանձնեց Հայաստանի Հանրապետութեան նախագահ Սերժ Սարգսեանի հրամանագիրով շնորհուած "Մովսէս Խորենացի" ի մետալը:

Դեսպան Սամուէլ Մկրտիչեան նշեց, թէ պարգեւատրութիւնը՝ լիբանանահայ համայնքի եւ Հայաստանին ցուցաբերուած եօթ տասնամեակներու վրայ երկարող անշահախնդիր նուիրումին արժանի գնահատականն է:

                                     

6. Աղբիւրներ

  • Արմէն Յարութիւնեան Եւ Կարապետ Պապահէքեան` Պարգեւատրուած
  • Լիբանանահայ համայնքային գործիչԱրմէն Յարութիւնեանին յանձնուել է Մովսէս Խորենացու մետալ
  • Լիբանանահայ Գործիչ Արմէն Յարութիւնեան Պարգեւատրուեցաւ "Մովսէս Խորենացի" ի Մետալով
  • Լիբանանահայ Գործիչ Արմէն Յարութիւնեան Պարգեւատրուեցաւ "Մովսէս Խորենացի" Մետալով
  • Սփիւռքի Նախարարութիւնը Կը Շնորհաւորէ
  • ՆԱՄԱԿՆԵՐ ՊԷՅՐՈՒԹԷՆ – Բ ԱՐՄԷՆ ՅԱՐՈՒԹԻՒՆԵԱՆ 13 ՅՈՒՆՈՒԱՐ 2011, ԿԼԵՆՏԷՅԼԻ ԳՐԱԴԱՐԱՆ
  • 250.000 Տոլարի Նուիրատուութեամբ` Արմէն Եւ Սալբի Յարութիւնեան Կրթանպաստի Ֆոնտ` Հայկազեան Համալսարանին Մէջ